İstifadəçilərə geniş imkanlar təqdim edən Android əlavə olaraq Root əməliyyatı ilə bu imkanları pik nöqtəyə çıxarır. Android cihazları Root etdikdə cihazın kök fayllarına daxil olmaq icazəsi vermiş olursunuz. Hakerlər üçün dəvatnamə sayılan Root əməliyyatını reallaşdırdıqda cihazınız zəmanətdən kənarda qalır.

Məşhur online kino/film provayderi Netflix Root-un qarşısını almaq üçün qəribə bir yola əl atıb. Netflix-in 5.0.4 versiyası artıq Root-lu Android cihazlarda işləmir. Buna səbəb olaraq isə Widevine DRM-in Root əməliyyatı ilə qırıla bilmə ehtimalı göstərilir.

Root-lu Android cihazlarda əgər Widevine DRM-də bir təhlükəsizlik açığı yaranarsa Netflix-dəki bütün məhsullar 4K formatında pirat versiya olaraq internetdə yayıla bilər. Netflix də bu riski gözə almaq yerinə onsuz da zəmanətdən kənarda qalan Root-lu cihazlara verdiyi dəstəyi kəsməyi qərara alıb.



Əgər Root-lu Android cihazından Netflix izləyirsinizsə son yeniləmədən sonra təəssüf ki, izləyə bilməyəcəksiniz. Yenidən Netflix izləmək üçün isə cihazınızdan Root icazəsini ləğv etməyiniz mütləqdir.